LIBROS PARA SOÑAR invita a nenos e nenas, nais e pais, a
celebrar HOXE venres a festa do Samaín cunha sesión especial de contos de medo a
partir das 18:30 horas, con entrada libre. Na Literatura Infantil e Xuvenil
contemporánea son moitos os títulos que abordan esta temática, mais o repertorio
da actividade incluirá obras de autores tan senlleiros como Maurice Sendak,
Mercer Mayer ou Anthony Browne, publicados no catálogo de
KALANDRAKA.
“Onde viven os monstros” será unha das historias máis
celebradas polos cativos, atraídos polas aventuras de Max, o protagonista deste
perfecto exemplo de álbum ilustrado.
Con “Un pesadelo no meu armario” o público infantil gozará
das peripecias dun neno para conciliar o sono pola noite, preocupado pola
presenza no seu cuarto dunha criatura que resulta non ser tan terrorífica como
parecía.
Para conto intrigante, “No bosque”, que transcorre nunha
misteriosa fraga na que personaxes de contos moi coñecidos polos lectores
vánselle presentando ao protagonista desta historia no camiño á casa da súa
avoa.
Non faltará “Gato Guille e os monstros”, de Rocío Martínez,
co que moitos nenos e nenas se identifican nos primeiros anos da infancia, cando
calquera ruído no entorno doméstico os asusta; uns temores que Guille aprenderá
a racionalizar coa axuda da súa nai.
LIBROS PARA
SOÑAR
Triunfo 1, Vigo. | 986 43 37
68
